ރާއްޖެއިން ބޭރުގައި ކިޔަވާ ދިވެހި ދަރިވަރުންގެ ކާޑު ލިމިޓް 1،200 ޑޮލަރަށް ބޭންކް އޮފް މޯލްޑިވްސް (ބީއެމްއެލް) އިން ބޮޑުކޮށްފި އެވެ.
ބީއެމްއެލްއިން ނެރުނު ނޫސް ބަޔާނެއްގައި ވަނީ އެ ނިންމުމާއެކު ރާއްޖެއިން ބޭރުގައި ކިޔަވާ ދަރިވަރުންގެ ޑެބިޓް ކާޑުން ނޮވެމްބަރު މަހުން ފެށިގެން ކޮންމެ މަހަކު 1،200 ޑޮލަރުގެ ޓްރާންސެކްޝަން ހެދޭނެ ކަމަށެވެ.
ބީއެމްއެލްގެ ސީއީއޯ މުހައްމަދު ޝަރީފް ވިދާޅުވީ ޑޮލަރުގެ ތާށިކަން ދިމާވެފައި އޮތް ދަނޑިވަޅުގައި ދަރިވަރުންނަށް ދިމާވާ ދަތިތައް ވެސް ބަލައިގަންނަ ކަމަށާއި މިގޮތުން ގެނެވުނު ބަދަލާ އެކު ދަރިވަރުންނަށް އިތުރު ފަސޭހަތަކެއް ވެގެންދާނެ ކަމަށެވެ.
މިހާތަނަށް ބޭރުގައި ކިޔަވާ ކުދިންނަށް ބީއެމްއެލްއިން ދެމުން އައީ 750 ޑޮލަރުގެ ލިމިޓެކެވެ.
ކާޑު ލިމިޓް ބޮޑު ކުރަން ބޭނުންވާ ދަރިވަރުން އޮންލައިން ޕޯޓަލް މެދުވެރިކޮށް ރަޖިސްޓާކޮށް، ޑޮކިއުމަންޓްތައް ހުށަހަޅަން ޖެހޭނެ ކަމަށް ވެސް އެ ބޭންކުން ބުންޏެވެ.
ބީއެމްއެލް އިން ބުނީ ޑޮލަރުގެ ހާލަތު ބެލުމަށްފަހު ކުރިއަށް އޮތް ދުވަސްތަކުގައި ގެންނަ ބަދަލުތައް އިއުލާން ކުރަމުންދާނެ ކަމަށެވެ.
ބޭންކުތަކުން ކަނޑައަޅާފައި އޮންނަ ޑޮލަރު ލިމިޓު އުވައިލުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދެކެވެ. އެކަމަކު ވެރިކަމަށް ވަޑައިގަތުމަށްފަހު އެކަމާ ގުޅޭ އެއްވެސް ވާހަކަފުޅެއް ނުދައްކަވަ އެވެ.
ރާއްޖެއިން ބޭރުގައި 1،800 އަށްވުރެ ގިނަ ދަރިވަރުން އަންނަނީ މަތީތައުލީމް ހާސިލުކުރަމުންނެވެ.
