ބޭންކް އޮފް މޯލްޑިވްސް (ބީއެމްއެލް)ގެ ބޯޑު ޑިރެކްޓަރަކަށް ހުންނަވަނިކޮށް މަގާމުން ވަކިކުރި އައިސްތު ނޫރައްދީން 42 އަހަރަށް ފަހު އެ ބޭންކުގެ ޑެޕިއުޓީ ސީއީއޯ އައިޝަތު ނޫރައްދީން (އައިސްތު) މަގާމުން ވެސް ވަކިވެވަޑައިގަތުމަށް ނިންމަވައިފި އެވެ.
ރާއްޖޭގެ އެންމެ މުއްސަނދި އެއް އާއިލާ، ކޮލިގެ އަށް ނިސްބަތްވާ އައިސްތު އެކަން އިއުލާން ކުރެއްވީ ބީއެމްއެލްގެ މުވައްޒަފުންނަށް މިއަދު ފޮނުއްވި އީމެއިލެއްގަ އެވެ. މިހާރު އުމުރުން 65 އަހަރުގެ އައިސްތު ބީއެމްއެލްގެ ޒިންމާތަކުން ފެންނާނެ އެންމެ ފަހު ދުވަހަކީ އަންނަ ނޮވެމްބަރު 7 ކަމަށް އޭނާ ވިދާޅުވެފައިވެ އެވެ.
އައިސްތު އެ ބޭންކުގެ މުވައްޒަފުންނަށް މިއަދު ފޮނުއްވި އީމެއިލްގައި ވިދާޅުވީ އެއީ މަގާމުގެ ހައިސިއްޔަތުން ދެއްވާ އެންމެ ފަހު މެސެޖު ކަމަށެވެ. އަދި ބީއެމްއެލްއަކީ އަބަދުވެސް އޭނާގެ ހިތުގައި ވަރަށް ހާއްސަ މަގާމެއް އޮންނާނެ ތަނެއް ކަމަށް ވެސް އައިސްތު ވިދާޅުވި އެވެ.
"އަޅުގަނޑު ބޭންކުގެ ވަޒީފާގައި ކުރިއަށް އޮތް މަދު ދުވަސްތަކުގެ ތެރޭގައި، އަޅުގަނޑު ތިޔައިގެ ތެރެއިން ގިނަ މުވައްޒަފުންނާ ބައްދަލުކޮށް އަދި ވަކިވެލުމުގެ ސަލާމް ކުރާނަމެވެ. އަދި ނޮވެންބަރު 7 ގައި ބޭއްވުމަށް ހަމަޖެހިފައިވާ އަހަރީ ދުވަސް ފާހަގަކުރުމުގެ ހަރަކާތްތަކުގައި ތިޔަ މުވައްޒަފުންނާއެކު ބައިވެރިވުމަށް އުންމީދުކުރަމެވެ،" މެސެޖުގައިވެ އެވެ.
އައިސްތު ވިދާޅުވިގޮތުގައި، ބީއެމްއެލްގެ ތަރައްގީ އާއި ކާމިޔާބީގެ މުހިންމު ކޮންމެ ވަގުތަކާއި އުފާވެރި ކޮންމެ ވަގުތެއް ވެސް އޭނާ އަށް ވަނީ ވަރަށް ލޯބި ވަގުތަކަށެވެ.
ބީއެމްއެލްގެ އާ ސީއީއޯ އަދި އެމްޑީ މުހައްމަދު ޝަރީފު ވެސް ވަނީ އައިސްތު މަގާމުން ވަކިވެވަޑައިގަންނަވާކަން އީމެއިލަކުން މުވައްޒަފުންނަށް މިއަދު ރަސްމީކޮށް އަންގަވައިފަ އެވެ.
އެ މެއިލްގައި ޝަރީފު ވިދާޅުވީ، އައިސްތުއަކީ ބީއެމްއެލްގެ އެންމެ ކާމިޔާބު ދުވަސްތަކުގައި އަދި އެންމެ ގޮންޖެހުންތައް ބޮޑު ދުވަސްތަކުގައި ވެސް ކާމިޔާބު ހޯއްދަވައި ދެއްވުމަށް ހިކުމަތްތެރިކަމާއި ވިސްނުންތެރިކަމާއެކު ސްޓްރެޓެޖީތައް އެކުލަވާލެއްވި ހުޝިޔާރު ލީޑަރެއް ކަމަށެވެ.
"އައިޝަތު ވަނީ ބޯޑާއި މެނޭޖްމަންޓްގައި ނުހަނު ބުރަ މަސައްކަތްތަކެއް ވެސް ކުރައްވާފައި. އަދި ބޭންކަށް އެވޯޑު ލިބިފައިވާ އިންޓަނޭޝަނަލް ބޭންކިންގެ ވިޔަފާރީގެ ފަހަތުގައިވާ ބާނީ އަކީ ވެސް ހަމަ އައިޝަތު،" އޭނާ ވިދާޅުވި އެވެ.
ސަރުކާރުން ބޭނުންވާ ގޮތަށް ކަންކަން ނުނިމިގެން އެ ބޭންކުގެ ބޯޑުން އައިސްތު ވަކިކުރަން ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ)ން ނިންމައި އެކަން އަންގާފައި ވަނިކޮށް އޭނާ ވަނީ މިދިޔަ އޮގަސްޓް މަހު އަމިއްލައަށް އިސްތިއުފާ ދެއްވައިފަ އެވެ.
އައިސްތުގެ ބަދަލުގައި ޑެޕިއުޓީ ސީއީއޯގެ މަގާމަށް އެ ބޭންކުގެ ޕީޕަލް އެންޑް ޗޭންޖް ޑިރެކްޓަރުގެ މަގާމުގައި ހުންނެވި ސަހާ ވަހީދު ހަމަޖައްސަން އުޅޭ ކަމަށް ވަނީ އަޑުފެތުރިފަ އެވެ.
