ކުރިއަށް އޮތް ސްކޫލު ޗުއްޓީއާ ދިމާކޮށް މޯލްޑިވިއަނުން ރާއްޖޭގެ އެކި ސަރަހައްދުތަކަށް ކުރާ ދަތުރުތައް އިތުރުކޮށްފި އެވެ.
ގައުމީ އެއާލައިނުން މިއަދު ބުނީ، ސްކޫލް ޗުއްޓީއާ ދިމާކޮށް އެ އެއާލައިނުން ދަތުރުކުރާ މަންޒިލުތަކަށް ދަތުރުތައް އިތުރުކޮށްފައިވާ ކަމަށެވެ.
ރާއްޖޭގެ 16 މަންޒިލަކަށް ދަތުރުކުރާ އެ އެއާލައިނުން ބުނީ މިހާރު ޓިކެޓު ބުކް ކުރެވޭނެ ކަމަށެވެ. ދަތުރުތައް އިތުރުކޮށްފައިވާ ގޮތަށް ބަލާއިރު، ފުވައްމުލައް ސިޓީއަށް މި މަހުގެ 16، 17 އަދި 19 ވަނަ ދުވަހު އިތުރު ދަތުރެއް އޮންނާނެ އެވެ. ހއ. ހޯރަފުއްޓަށް މި މަހުގެ 16 އަދި 18 ވަނަ ދުވަހު އިތުރު ދަތުރެއް އޮންނާނެ އެވެ.
އައްޑޫ ސިޓީ ގަމަށް މި މަހުގެ 16 ވަނަ ދުވަހު އިތުރު ދަތުރެއް އޮންނާނެ އެވެ. އަދި މި މަހުގެ 18 އަދި 19ގައި ކޮންމެ ދުވަހަކު އިތުރު ދެ ދަތުރު އޮންނާނެ ކަމަށް ވެސް މޯލްޑިވިއަނުން ބުންޏެވެ.
ކުޅުދުއްފުށި ސިޓީއަށް މި މަހުގެ 17ގައި އިތުރު ދަތުރެއް އޮންނައިރު، ލ. ކައްދުއަށް މި މަހު 17 އަދި 18ގައި އިތުރު ދަތުރެއް އޮންނާނެ އެވެ.
ށ. ފުނަދުއަށް މި މަހުގެ 17 އަދި 20ގައި އިތުުރު ދަތުރެއް އޮންނައިރު، ގދ. ފަރެސްމާތޮޑާއަށް މި މަހުގެ 18ގައި އިތުރު ދަތުރެއް އޮންނާނެ އެވެ. ބ. ދަރަވަންދުއަށް މި މަހުގެ 19ގައި އިތުރު ދަތުރެއް އޮންނައިރު، ހދ. ހަނިމާދުއަށް މި މަހުގެ 19ގައި އިތުރު ދަތުރެއް އޮންނާނެ އެވެ. މީގެއިތުރުން ގދ. މާވާރުލަށް މި މަހުގެ 20ގައި އިތުރު ދަތުރެއް އޮންނާނެ ކަމަށް ވެސް މޯލްޑިވިއަނުން ބުންޏެވެ.
