މެދުއިރުމަތީގައި މިހާރު ހިނގަމުންދާ ހަމަނުޖެހުންތަކުގެ ސަބަބުން، ދުނިޔޭގެ ވައިގެ ދަތުރުފަތުރަށް ދިމާވެފައިވާ ބުރޫއެރުންތަކާ ގުޅިގެން، ވިޒިޓް މޯލްޑިވްސް ކޯޕަރޭޝަން (ވީއެމްސީ) އިން ކަމާގުޅޭ ވުޒާރާތަކާއި ސިނާއަތުގެ ބައިވެރިންނާ ގުޅިގެން ހަރުދަނާ ފިޔަވަޅުތަކެއް އަޅަން ފަށައިފި އެވެ.
ރާއްޖޭގެ ޓޫރިޒަމް ޕްރޮމޯޓްކުރާ ވިޒިޓް މޯލްޑިވްސް އިން ބުނީ ދަތުރުތައް މެދުކެނޑުމުގެ ސަބަބުން ފަތުރުވެރިންނަށާއި މި ދާއިރާގައި މަސައްކަތްކުރާ ފަރާތްތަކަށް ކުރިމަތިވަމުންދާ ދަތިތަކަށް ހައްލެއް ހޯދައިދިނުމަށްޓަކައި، ވިޒިޓް މޯލްޑިވްސް އިން އިސްކަންދެނީ ފަތުރުވެރިންގެ ރައްކާތެރިކަން ކަށަވަރު ކުރުމަށާއި ރާއްޖޭގެ ފަތުރުވެރިކަމަށް ކުރާ ނޭދެވޭ އަސަރު ކުޑަކުރުމަށް ކަމަށެވެ.
މިހާތަނަށް ކުރެވުނު މަސައްކަތްތަކުގެ ތެރެއިން، ވިޒިޓް މޯލްޑިވްސްގެ އެހީތެރިކަމާއެކު ޖަރުމަނާއި ފްރާންސް ހިމެނޭހެން ޖުމްލަ އަށް ރިޕެޓްރިއޭޝަން ފްލައިޓް ބާއްވާފައިވާ ކަމަށް ވިޒިޓް މޯލްޑިވްސް އިން ބުނެ އެވެ.
މީގެ އިތުރުން، ވެލާނާ އިންޓަނޭޝަނަލް އެއާޕޯޓުގައި މޯލްޑިވްސް އެއާޕޯޓްސް ކޮމްޕެނީ (އެމްއޭސީއެލް) އާއި ޓޫރިޒަމް މިނިސްޓްރީގެ އެހީތެރިކަމާއެކު ހާއްސަ "ހެލްޕް ޑެސްކް" އެއް ވަނީ ގާއިމުކޮށްފައިވާ ކަމަށް އެ ކުންފުނިން ބުނެ އެވެ. އަދި މި ޑެސްކު މެދުވެރިކޮށް ދަތުރުވެރިންނަށް ބޭނުންވާ އިރުޝާދާއި އެހީތެރިކަން ފޯރުކޮށްދެމުން އަންނަ ކަމަށް ވިޒިޓް މޯލްޑިވްސް އިން ބުނެ އެވެ.
އެ ކުންފުނިން ބުނީ ކުރިމަތިވެފައިވާ މި ހާލަތުން އަރައިގަތުމަށްޓަކައި، ވިޒިޓް މޯލްޑިވްސްއިން އެކި އެއާލައިންތަކާއެކު މަޝްވަރާކޮށް އިތުރު ފްލައިޓްތައް ބޭއްވޭނެ އިންތިޒާމުތައް ހަމަޖައްސަމުން އަންނަ ކަމަށެވެ. އަދި ރާއްޖެއަށް ޒިޔާރަތްކުރާ ޓޫރިސްޓުން އަދަދު ދެމެހެއްޓުމަށްޓަކައި، ދަތުރުފަތުރަށް މާބޮޑު ބުރޫއެއް އަރާފައިނުވާ އިންޑިއާ، ޗައިނާ އަދި ރަޝިއާ ފަދަ މާކެޓުތަކަށް އަމާޒުކޮށްގެން ހާއްސަ ކެމްޕޭންތަކެއް ހިންގުމަށް ސިނާއަތުގެ ބައިވެރިންނާއެކު މަސައްކަތް ފަށާފައިވާ ކަމަށް ވިޒިޓް މޯލްޑިވްސް އިން ބުނެ އެވެ. މިގޮތުން ޓުއާ އޮޕަރޭޓަރުންނާއި އެޖެންޓުންނާ ގުޅިގެން ކުރިއަށްގެންދާ މި ހަރަކާތްތަކަކީ ފަތުރުވެރިކަމުގެ ދާއިރާއަށް ލިބޭ ގެއްލުން ކުޑަކުރުމަށް އެޅޭ މުހިންމު ފިޔަވަޅެއް ކަމަށް އެ ކުންފުނިން ބުނެ އެވެ.
މުސްތަގްބަލަށް ރޭވުމުގެ ގޮތުން، ރާއްޖޭގެ ފަތުރުވެރިކަމަށް ހާއްސަ "ކްރައިސިސް ރެސްޕޮންސް ސްޓްރެޓެޖީ" އެއް އެކުލަވާލަމުން އަންނަ ކަމަށް ވިޒިޓް މޯލްޑިވްސް އިން ބުނެ އެވެ. މި މަސައްކަތުގެ ދަށުން، ސިނާއަތުގެ ބައިވެރިންނާ ބައްދަލުކޮށް، މައުލޫމާތު ހިއްސާކުރުމާއި ކުރިމަތިވެފައިވާ ގޮންޖެހުންތަކުން އަރައިގަތުމަށް އެޅިދާނެ ފިޔަވަޅުތަކާ ބެހޭގޮތުން މަޝްވަރާކުރުމަށް ނިންމާފައިވާ ކަމަށް އެ ކުންފުނިން ބުނެ އެވެ.
