މި ހިނގާ ސެޕްޓެންބަރު މަހު ރާއްޖެއަށް ޒިޔާރަތްކުރި ފަތުރުވެރިންގެ އަދަދު، ވޭތުވެދިޔަ އަހަރުގެ މި މުއްދަތާ އަޅައިބަލާއިރު 1.3 ޕަސެންޓް އިތުރުވެފައިވާ ކަމަށް ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައިފި އެވެ.
ޓޫރިޒަމް މިނިސްޓްރީން އެންމެ ފަހުން އާންމުކުރި ތަފާސްހިސާބުތަކުގައިވާ ގޮތުން، މި މަހުގެ 27 ވަނަ ދުވަހުގެ ނިޔަލަށް 134,339 ފަތުރުވެރިން ވަނީ ރާއްޖެއަށް އައިސްފަ އެވެ. މިއީ މިދިޔަ އަހަރުގެ ސެޕްޓެންބަރު މަހުގެ 27 ގެ ނިޔަލަށް ރާއްޖެ އައި ފަތުރުވެރިންގެ އަދަދާ އަޅައިބަލާއިރު ފާހަގަކޮށްލެވޭ ކުރިއެރުމެކެވެ.
މި އަހަރުގެ މިހާތަނަށް ރާއްޖެއަށް ޖުމްލަ 1.59 މިލިއަން ފަތުރުވެރިން ޒިޔާރަތްކޮށްފައިވާއިރު، މިއީ މިދިޔަ އަހަރުގެ މި މުއްދަތުގައި އައި 1.64 މިލިއަން ފަތުރުވެރިންނާ އަޅައިބަލާއިރު 3.3 ޕަސެންޓުގެ ދަށްވުމެކެވެ. ރާއްޖެއަށް މި އަހަރު އައި ފަތުރުވެރިންގެ އަދަދު ދަށްވާން މައިގަނޑު ސަބަބަކީ، މިދިޔަ ފެބުރުވަރީ މަހުގެ 28 ވަނަ ދުވަހު މެދުއިރުމަތީގައި ފެށުނު ހަނގުރާމައާ ގުޅިގެން ވައިގެ ދަތުރުފަތުރަށް ބުރޫއެރުމެވެ. ނަމަވެސް، މިދިޔަ މަހަކީ ހަނގުރާމަ ފެށުނު ފަހުން ރާއްޖެއަށް އެންމެ ގިނައިން ފަތުރުވެރިން އައި މަހެވެ.
ތަފާސްހިސާބުތައް ދައްކާ ގޮތުން ރާއްޖެ އައި ފަތުރުވެރިންގެ ތެރެއިން 1.15 މިލިއަން މީހުން ޗުއްޓީ ހޭދަކޮށްފައިވަނީ ރިސޯޓުތަކުގަ އެވެ. އަދި ގެސްޓްހައުސްތަކުގައި 342,557 ފަތުރުވެރިން އަދި ސަފާރީ އުޅަނދުފަހަރުގައި 29,548 ފަތުރުވެރިން ޗުއްޓީ ހޭދަކޮށްފައިވެ އެވެ.
މާކެޓްތަކަށް ބަލާއިރު ރާއްޖެއަށް އެންމެ ގިނައިން ފަތުރުވެރިން އަންނަނީ ޗައިނާ އަދި ރަޝިއާއިންނެވެ. މި ދެ ގައުމުން އެކަނިވެސް ފަސް ލައްކައަށް ވުރެ ގިނަ ފަތުރުވެރިން ރާއްޖެ އައިސްފައިވެ އެވެ. މީގެ އިތުރުން އިނގިރޭސިވިލާތުން އެއް ލައްކައަށް ވުރެ ގިނަ ފަތުރުވެރިން އަދި ޖަރުމަނުވިލާތުން 98,052 ފަތުރުވެރިން ރާއްޖެއަށް ޒިޔާރަތްކޮށްފައިވެ އެވެ.
