ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ން، ހުޅުމާލޭގެ ދެވަނަ ފިޔަވަހިން ސިނާއީ ބޭނުމަށް ވިއްކަން އިއުލާނުކުރި ބިންތަކުގެ ސައިޒު ކުޑަކޮށް އަގު ހެޔޮކޮށްފި އެވެ.
މި މަހުގެ ދެވަނަ ދުވަހު އެޗްޑީސީން ވަނީ އިންޓަގްރޭޓެޑް ހަބުން 12 ބިމެއް ވިއްކަން އިއުލާންކޮށްފަ އެވެ. އެއީ 3746 އަކަފޫޓުގެ އަށް ބިމަކާއި 3689 އަކަފޫޓުގެ ހަތަރު ބިމެކެވެ.
އެޗްޑީސީން އިއްޔެ ކުރި އިއުލާނެއްގައި ވަނީ 16 ބިން އެ ސަރަހައްދުން ވިއްކަން ނިންމާފައިވާ ކަމަށެވެ. އެގޮތުން 1538 އަކަފޫޓުގެ 12 ބިމާއި 1515 އަކަފޫޓުގެ ހަތަރު ބިމެއް ވިއްކާނެކަމަށް ބުނެފައިވެ އެވެ.
އެޗްޑީސީން ކުރިން ކުރި އިއުލާނުގައިވާގޮތުން ބީލަން ފެށޭ އަގަކީ އަކަފޫޓަކަށް 7500ރ. އެވެ. ނަމަވެސް ފަހުން ކުރި އިއުލާނުގައި އެ އަގު ވަނީ އަކަފޫޓަކަށް 5500ރ. އަށް ދަށްކޮށްފަ އެވެ.
މި ބިންތައް ގަންނަން ބޭނުންވާ ފަރާތްތަކަށް އެޗްޑީސީގެ ބިޑް ޕޯޓަލް މެދުވެރިކޮށް އެޕްލިކޭޝަން ހުށަހެޅޭނެ ކަމަށް އެ ކުންފުނިން ބުނެ އެވެ.
އެޗްޑީސީން ބުނީ ދިވެހި އަމިއްލަ ފަރުދުންގެ އިތުރުން 100 އިންސައްތަ ދިވެހިންގެ ހިއްސާ އޮންނަ ކުންފުނިތަކަށް ވެސް ބީލަމުގައި ބައިވެރިވުމުގެ ފުރުސަތު ހުޅުވާލާފައިވާ ކަމަށެވެ.
ހުޅުމާލެއިން މީގެ ކުރިން ވިއްކަން އިއުލާންކުރި ބިންތަކަށް ތަރުހީބު ނުލިބުމުން އެޗްޑީސީން ވަނީ މި މަހުގެ 13 ގައި ވެސް އިތުރު 18 ބިމެއް ވިއްކަން ހުޅުވާލާފަ އެވެ.
ދިރިއުޅުމަށް ބިން ވިއްކުމަށް އެފަހަރު ހުޅުވާލާފައި ވަނީ ހުޅުމާލެ ދެވަނަ ފިޔަވަހީގެ ބީޗް ފަޅިންނެވެ. މީގެ ތެރޭގައި ހިމެނެނީ ބީޗް ފްރަންޓުން ދެ ބިމަކާއި، ބީޗް ސައިޑް 16 ބިމެކެވެ. އެ ބިންތަކަކީ 1،864 އަކަފޫޓާއި 2،408 އަކަފޫޓުގެ ބިންތަކެކެވެ.
