ހުޅުމާލެ ފުރަތަމަ ފިޔަވަހީގައި ހަދާފައިވާ އެސްޖޭ މޯލްއާ ޖެހިގެން އޮންނަ ހުސް ބިން މޯލް ހިންގާ އެސްޖޭ ކުންފުންޏަށް އިއުލާންކުރުމެއް ނެތި ސިއްރުން ހައުސިން ޑިވަލޮޕްމަންޓް ކޯޕަރޭޝަން (އެޗްޑީސީ) އިން ވިއްކާލުމަށް ނިންމާފައިވާކަން ހާމަވެއްޖެ އެވެ.
އެކަން ހާމަވެފައިވަނީ ރައްޔިތުންގެ މަޖިލީހުގެ މާލިއްޔަތު ކޮމިޓީއަށް އެޗްޑީސީގެ ފަރާތުން މައުލޫމާތު ދިނުމަށް އެ ކުންފުނީގެ އިސްވެރިން މިއަދު ވަޑައިގެންނެވިއިރު، ކުންފުނީގެ މެނޭޖިން ޑިރެކްޓަރު ފަޒުލް ރަޝީދު ދެއްކެވި ވާހަކަފުޅުގަ އެވެ.
އެ ބައްދަލުވުމުގައި ހަނިމާދޫ ދާއިރާގެ މަޖިލިސް މެންބަރު އަބްދުލްގަފޫރު މޫސާ ކުރެއްވި ސުވާލަކަށް ޖަވާބުދެއްވަމުން ފަޒުލް ވިދާޅުވީ، އެސްޖޭ މޯލްއާ ޖެހިގެން އޮންނަ ބިން ހޯދަން އެ ކުންފުނިން އެޗްޑީސީ އަށް ޕްރޮޕޯސަލެއް ހުށަހަޅައިފައިވާ ކަމަށެވެ. އެ ޕްރޮޕޯސަލާ އެއްގޮތަށް އެ ބިން ދޭން އެޗްޑީސީން ނިންމާފައިވާކަން ފަޒުލުގެ ވާހަކަފުޅުން އެނގެ އެވެ.
ފަޒުލް ވިދާޅުވީ އެސްޖޭ މޯލްއާ ޖެހިގެން އޮތް ބިން އެ ކުންފުންޏަށް ވިއްކާލުމުން އެޗްޑީސީ އަށް އާމްދަނީ ހޯދެން އޮތް ބިމެއް ގެއްލޭނެ ކަމަށެވެ. އެހެންކަމުން އޭގެ ބަދަލުގައި އެޗްޑީސީ އަށް އާމްދަނީ ލިބޭނެ މަގެއް ހޯދައި، އެ ކަމަށް އެސްޖޭއިން އިވެންސްޓް ކުރަން ޖެހޭ ގޮތަށް ނިންމި ކަމަށް އޭނާ ވިދާޅުވި އެވެ.
އެގޮތުން ހުޅުމާލެ ރުއްގަނޑު ތެރޭގައި 20 މިލިއަން ރުފިޔާގެ ހަޓުތަކެއް އަޅަން އެސްޖޭއާ ހަވާލުކުރި ކަމަށާއި އެކަން އެ ކުންފުނިން ކުރަން ނިންމާފައިވަނީ މޯލްއާ ޖެހިގެން އޮންނަ ބިން ވިއްކުމުގެ މުއާމަލާތުގެ ތެރޭގައި ހިމެނޭ ސީއެސްއާރުގެ ދަށުން ކަމަށް ފަޒުލް ވިދާޅުވި އެވެ.
ބިން ވިއްކާލަން ނިންމާފައިވަނީ ކޮން އަގެއްގައިތޯ ގަފޫރު ސުވާލުކުރެއްވުމުން ފަޒުލް ޖަވާބެއް ނުދެއްވި އެވެ. ސީއެސްއާރުގެ ދަށުން ހަޓުތައް އަޅާ ބިން އަދި އެސްޖޭ އާ ހަވާލުނުކުރާ ކަމަށް ފަޒުލް ވިދާޅުވި އެވެ.
ފާހަގަކޮށްލެވޭ ގޮތުގައި ހުޅުމާލެގެ ޕްރައިމް ސަރަހައްދަކުން އަގު ބޮޑު އެ ބިން އެސްޖޭއަށް ވިއްކަން އެޗްޑީސީން ނިންމިއިރު، އެ ބިން ވިއްކުމަށް އެއްވެސް އިއުލާނެއް ކޮށްފައިނުވެ އެވެ.
އެހެންކަމުން އެޗްޑީސީގެ މި މުއާމަލާތަކީ ކޮރަޕްޝަނަށް މަގުފަހިވާގޮތަށް ކޮށްފައިވާ މުވާމަލާތެއްކަމަށް ގިނަ ބަޔަކު ދަނީ ތުހުމަތު ކުރަމުންނެވެ.
