ޓޫރިޒަމް ދާއިރާގެ ޖީއެސްޓީ ރޭޓަށް ބަދަލު އަންނާތީ ފަތުރުވެރިކަމުގެ ދާއިރާގެ ހިދުމަތްތައް ދޭ ފަރާތްތަކުން މިކަމަށް ދުރާލާ ތައްޔާރުވުމަށް މޯލްޑިވްސް އިންލޭންޑް ރެވެނިއު އޮޓޯރިޓީ (މީރާ) އިން އިލްތިމާސްކޮށްފި އެވެ.
މުދަލާއި ހިދުމަތުގެ އަގުން ޓެކްސް ނެގުމުގެ ގާނޫނަށް 7 ވަނަ އިސްލާޙު ގެނައުމުގެ ގާނޫނުގެ ދަށުން 1 ޖުލައި 2025 އިން ފެށިގެން ޓޫރިޒަމް ދާއިރާގެ ޖީއެސްޓީ ރޭޓް 17 އިންސައްތަ އަށް ބަދަލުވާނެކަމަށް މީރާއިން ބުނެފައިވާއިރު، މި ތާރީހުގެ ފަހުން ޖީއެސްޓީ ލާޒިމުވާ ވަގުތު އަންނަ ޓޫރިޒަމް ދާއިރާގެ މުދަލާއި ހިދުމަތުގެ މުއާމަލާތްތަކުން ޖީއެސްޓީ ނަގަންވާނީ އައު ރޭޓުގައި ކަމަށް މީރާއިން ވަނީ ބުނެފަ އެވެ.
އަންނަ އަހަރުގެ ޖުލައި އެއްވަނަ ދުވަހުން ފެށިގެން އާ ރޭޓުގައި ޖީއެސްޓީ ނެގުމަށްޓަކައ،ި ސިސްޓަމްތަކަށް ގެންނަންޖެހޭ ބަދަލުތައް ގެނައުމަށާއި ޓޫރިޒަމް ދާއިރާގެ މުދަލާއި ހިދުމަތުގައި އެ ތާރީހުން ފެށިގެން އާ ރޭޓުތައް ހިމަނައިގެން އަގު ޖެހުމަށްޓަކައި ކުރަންޖެހޭ ކަންތައްތައް ދުރާލާ ރާވައިގެން ކުރިއަށް ގެންދިއުމަށް މީރާއިން ވަނީ އިލްތިމާސްކޮށްފަ އެވެ.
ޓޫރިޒަމް ދާއިރާގެ ޖީއެސްޓީއަށް ރަޖިސްޓަރީކޮށްފައިވާ ފަރާތަކީ 24 ގަޑިއިރުގެ އުސޫލުން ވިޔަފާރިކުރާ ފަރާތެއް ކަމުގައިވާނަމަ އަންނަ އަހަރުގެ ޖުލައި މަޖހުގެ އެއްވަނަ ދުވަހުގެ ދަންވަރު 00:00 ގެ ކުރިން ފޯރުވައިދޭ ޓޫރިޒަމް ދާއިރާގެ މުދަލާއި ހިދުމަތުގެ އަގުން ޖީއެސްޓީ ނަގަންވާނީ 16 އިންސައްތައިގެ ރޭޓުން ކަމަށް މީރާއިން ބުނެ އެވެ.
އެހެންކަމުން އަންނަ އަހަރުގެ ޖުލައިމަހުގެ އެއްވަނަ ދުވަހުގެ ރޭ ދަންވަރު 12 ގައި ނުވަތަ އޭގެ ފަހުން ފޯރުވައިދޭ ޓޫރިޒަމް ދާއިރާގެ މުދަލާއި ހިދުމަތުން ޖީއެސްޓީ ނަގަންވާނީ 17 އިންސައްތައިގެ ރޭޓުން ކަމަށް މީރާއިން ވަނީ ބުނެފަ އެވެ.
