އިޒްރޭލާއި އެމެރިކާ އިން އީރާނާ ދެކޮޅަށް ކުރާ ކުރަމުންދާ ހަނގުރާމައާ ގުޅިގެން ދަތުރުތައް ދަތުރުތައް މެދުކަނޑާލި ދުބާއީގެ އެމިރޭޓްސް އެއާލައިނުން ރާއްޖެއަށް ހާއްސަ ދަތުރެއް ކޮށްފި އެވެ.
ވެލާނާ އިންޓަނޭޝަނަލް އެއާޕޯޓު އޮޕަރޭޓްކުރާ އެމްއޭސީއެލްގެ އިސް އޮފިޝަލަކު ވިދާޅުވީ އެމިރޭޓްސްގެ ހާއްސަ ފްލައިޓެއް މިއަދު ހެނދުނު ރާއްޖެ އައި ކަމަށެވެ. އަދި އެ ފްލައިޓުން ގެންދިޔައީ ރާއްޖޭގައި ތާށިވެފައި ތިބި ޔޫއޭއީގެ ޕާސްޕޯޓް ހޮލްޑަރުންނާއި ރެސިޑެންޓް ކާޑު ހޮލްޑަރުން އެކަނި ކަމަށް އޭނާ ވިދާޅުވި އެވެ.
"އެ ފްލައިޓް އެކަނި މިއަދު އައީ. އިތުރު ފްލައިޓެއް އަންނާނެ ދުވަހެއް އަދިވެސް ނޭނގެ،" އެ އޮފިޝަލް ވިދާޅުވި އެވެ.
އޭނާ ވިދާޅުވީ މެދުއިރުމަތިން އަންނަ ފްލައިޓްތައް ދަތުރުތައް ކެންސަލް ކުރުމުން މިހާރު ދުވާލަކު 2،000 އަށް ވުރެ ގިނަ ޓޫރިސްޓުން މަދުވެފައިވާ ކަމަށެވެ.
ޔޫއޭއީ ސަރުކާރުން ވަނީ ތާށިވެފައި ތިބި ފަސިންޖަރުން ޔޫއޭއީން ރައްކާތެރިކާއެކު ނުކުތުމަށް "ސޭފް ކޮރިޑޯ"އެއް ކަނޑައަޅައި، މިއަދުން ފެށިގެން 80 ބޯޓު ބޭނުންކޮށްގެން ގަޑިއަކު 48 ފްލައިޓް ދަތުރު ކުރަން ނިންމައިފަ އެވެ.
އިޒްރޭލާއި އެމެރިކާ އިސްވެ އޮވެ، އީރާނަށް ހަމަލާތައް ދެމުން ގެންދިއުމާ ގުޅިގެން މެދުއިރުމަތިން ރާއްޖެއަށް އަންނަން އޮތް 14 ފްލައިޓެއް ވަނީ ކެންސަލްވެފަ އެވެ. މިއާއެކު 5،000 އަށް ވުރެ ގިނަ ޓޫރިސްޓުން ނުފުރި ރާއްޖޭގައި ތާށިވެފައި އެބަތިއްބެވެ. އަދި އޭގެ ތެރެއިން ބައެއް މީހުން މާލެ އާއި ކައިރި ރަށްރަށުގައި ހުރި ގެސްޓް ހައުސްތަކަށް ބަދަލުވެފަ އެވެ.
އެމްއޭސީއެލްގެ އޮފިޝަލަކު ވިދާޅުވީ ވެލާނާ އިންޓަނޭޝަނަލް އެއާޕޯޓުގައި އަދިވެސް ބައެއް ޓޫރިސްޓުން ނުފުރި ތާށިވެފައި އެބަ ތިބި ކަމަށެވެ.
"މިތަނުގައި ކުރިން ޑޮމެސްޓިކް ޓާމިނަލްގެ ގޮތުގައި ބޭނުންކުރި ތަނުގައި އަދިވެސް ގެސްޓުން އެބަ އުޅޭ. އެކަމަކު މިހާރު ވަރަށް ގިނަ މީހުން އެކި ތަންތަނަށް ގޮސްފި،" އޭނާ ވިދާޅުވި އެވެ.
