ރާއްޖޭގެ އެންމެ ބޮޑު ގޭމިން ޕްލެޓްފޯމް، ދިރާގު ގޭމާސް ގިލްޑް (ޑީޖީޖީ) އިން ކުރިއަށްގެންދާ "ރޯދަ ކުއެސްޓް" ކާމިޔާބުކަމާއެކު ފަށައިފި އެވެ.
މާޗު މަހުގެ 9 ވަނަ ދުވަހުގެ ނިޔަލަށް، ކުރިއަށްދާ މި ހަރަކާތަކީ ގޭމިން ކޮމިއުނިޓީއަށް އަމާޒުކޮށްގެން ތަފާތު ގޭމިން ތަޖުރިބާތަކެއް ފޯރުކޮށްދިނުމަށް ބާއްވާ ހަރަކާތެކެވެ.
ދިރާގުން ބުނިގޮތުގައި މި ފޯރިގަދަ މުބާރާތުގައި މިހާތަނަށް 200 އަށްވުރެ ގިނަ ކުޅުންތެރިން ވަނީ ބައިވެރިވެފަ އެވެ.
މި މުބާރާތުގެ ތެރޭގައި ހިމެނެނީ މަގުބޫލު ގޭމްތައް ކަމަށްވާ ބްރޯލްހާލާ، މޮބައިލް ލެޖެންޑްސް:
ބޭންގް ބޭންގް، އީއޭއެފްސީ 26 އަދި ޓެކެން 8 ފަދަ ގޭމްތަކެވެ. މި ހަރަކާތް ފަރުމާކޮށްފައިވަނީ ހުރިހާ ފެންވަރެއްގެ ގޭމް ކުޅުންތެރިންނަށް ބައިވެރިވެވޭ ފަދަ ގޮތަކަށެވެ.
ކޮންމެ ރެއަކުވެސް ރޭގަނޑު 9:00 އިން މެންދަމު 12:00 އަށް ކުރިއަށްދާ މި ހަރަކާތަކީ، ގޭމް ކުޅުމަށް ޝައުގުވެރިވާ ފަރާތްތައް އެއްތަނަކަށް ޖަމާވެ، ވާދަވެރި މާހައުލެއްގައި ހުނަރު ދައްކާލުމަށާއި އިޖުތިމާއީ ގުޅުން ބަދަހިކުރުމަށް ހުޅުވާލެވިފައިވާ ފުރުސަތެކެވެ. މީގެ އިތުރުން، މިއީ ރާއްޖޭގައި ފުޅާވަމުން އަންނަ އީ-ސްޕޯޓްސް ގެ ސަގާފަތް ތަޖުރިބާ ކުރުމަށް ލިބިގެންދާނެ ރަނުގެ ފުރުސަތެކެވެ.
މި އިވެންޓުގެ ބައިވެރިންނަށް، އިވެންޓުގެ ޕާޓްނަރުން ކަމަށްވާ މިނިސޯ، ޝީޝާ، މެގަޗިޕް އަދި ވިލާމާޓުން ހުށަހަޅާފައިވާ ހާއްސަ އިނާމުތަކެއް ހޯދުމުގެ ފުރުސަތު ލިބޭނެއެވެ. މީގެ އިތުރުން، އިވެންޓަށް ޒިޔާރަތްކުރާ ފަރާތްތަކަށް ހާއްސަކޮށްގެން ކުރިއަށްގެންދާ އެކި ހަރަކާތްތަކުގައި ބައިވެރިވެގެންވެސް އަގުހުރި އިނާމުތަކެއް ހޯދުމުގެ ފުރުސަތު ވަނީ ހުޅުވާލެވިފަ އެވެ.
މި މުބާރާތްތަކުގައި ބައިވެރިވާން ބޭނުންވާ ފަރާތްތަކަށް dgg.mv މެދުވެރިކޮށް ރަޖިސްޓްރީ ކުރެވޭނެ އެވެ. އަދި އިވެންޓަށް ޒިޔާރަތްކުރާ ފަރާތްތަކަށް އެތަނުގައި ތައްޔާރުކޮށްފައިވާ ގޭމް ސްޓޭޝަންތަކުގައި ހިލޭ ގޭމް ކުޅުމުގެ ފުރުސަތުވެސް ލިބިގެންދާނެ އެވެ.
ރާއްޖޭގެ އެންމެ ބޮޑު ގޭމިން ޕްލެޓްފޯމް ކަމުގައިވާ ޑީޖީޖީ އިން ދަނީ ރާއްޖޭގެ އެކި ކަންކޮޅުތަކުގައި އީ-ސްޕޯޓްސް ކުރިއެރުވުމަށް ގިނަ މަސައްކަތްތަކެއް ކޮށް، އަންނަން އޮތް ޖީލުތަކުގެ ގޭމިންގ ހުނަރުތައް އިތުރުކުރުމަށް މުހިންމު މަސައްކަތްތަކެއް ކުރަމުންނެވެ.
ޑީޖީޖީ އިން ކުރިއަށް ގެންދާ ހަރަކާތްތަކުގެ އެންމެ ފަހުގެ މައުލޫމާތުތައް dgg.mv މެދުވެރިކޮށް ލިބިގެންދާނެ އެވެ.
