ދިރާގުގެ 38ވަނަ އަހަރީ ދުވަހާ ހަމައަށް ވާސިލުވީއިރު ރާއްޖޭގެ ޑިޖިޓަލް ޓްރާންސްފޯމޭޝަންގެ މޭސްތިރިއެއްގެ ގޮތުން ހޯދައިފައިވާ ކާމިޔާބީތައް ފާހަގަކުރަމުން، މި ދުވަހުގެ މުނާސަބަތުގައި ދިރާގުން ކަސްޓަމަރުންނަށް ހާއްސަ އޮފަރތަކެއް ތައާރަފްކޮށްފި އެވެ.
މި އޮފާތައް އިއުލާނުކޮށްފައިވަނީ މިއަދު ދިރާގު ހެޑް އޮފީހުގައި ބޭއްވި ހާއްސަ ޕްރެސް ކޮންފަރެންސެއްގަ އެވެ. މި ޕްރެސް ކޮންފަރެންސްގައި އެ ކުންފުނީގެ އައު ސީއީއޯ އަދި އެމްޑީ ވަލްޑީ ފެރަޑާޒް ވެސް ވަނީ ބައިވެރިވެވަޑައިގެންފަ އެވެ.
މި ޕްރެސް ކޮންފަރެންސްގައި ވާހަކަދައްކަވަމުން ވަލްޑީ ވިދާޅުވިގޮތުގައި، ދިރާގުގެ 38ވަނަ އަހަރީ ދުވަސް ފާހަގަކުރަމުންދާއިރު، ރާއްޖެ ހޯދާފައިވާ ކުރިއެރުމާއި ކާމިޔާބީގެ ބާރުވެރިއެއްގެ ގޮތުގައި ދިރާގުން އަދާކޮށްފައިވާ މުހިންމު ދައުރަކީ ލިބޭ ވަރަށް ބޮޑު ފަހުރެކެވެ. މި ގޮތުން، ރާއްޖޭގެ އިގްތިސާދުގެ ދާއިރާއަށް، އަދި އެހެނިހެން ސިނާއަތްތަކަށް ލިބިފައިވާ ކުރިއެރުންތަކަކީ ދިރާގުގެ ބައިވެރިވުމާ ނުލައި ތަސައްވަރުކުރަން ވެސް ދަތި ކަންކަމެއް ކަމަށް އޭނާ ވިދާޅުވި އެވެ.
" ދިވެހިރާއްޖޭގެ ރަށްތައް ގުޅުވައިދިނުމުން ފެށިގެން، ގައުމުގެ ޑިޖިޓަލް ބަދަލުތަކަށް މަގުފަހިކޮށްދިނުމާ ހަމައަށް، މުޅި ރާއްޖޭގެ ތަރައްގީގެ ބިންގާ އެޅުމުގައި ދިރާގުން ވަނީ ނުހަނު މުހިންމު ދައުރެއް އަދާކޮށްދީފަ. މި ފުރުސަތުގައި، އަޅުގަނޑުމެންގެ ކަސްޓަމަރުންނާއި، ޕަރޓްނަރުންނާއި، ހިއްސާދާރުންނާއި، ރެގިއުލޭޓަރުންގެ އިތުރުން ދިވެހި ސަރުކާރުން އަޅުގަނޑުމެންނަށް ދެއްވަމުންގެންދަވާ އިތުބާރާއި އެއްބާރުލުމަށްޓަކައި ޝުކުރު ދަންނަން. އަދި ދިރާގުގެ ކާމިޔާބީގެ އަސްލުކަމުގައިވާ ދިރާގުގެ ހުނަރުވެރި އަދި ހީވާގީ ކުރީގެ އަދި މިހާރުގެ މުވައްޒަފުން ހޯދަމުންގެންދާ ކާމިޔާބީތައް ފާހަގަކޮށް، ޝުކުރާއެކު ސާބަސްދެން."
އަޅުގަނޑުމެންގެ ކާމިޔާބު މާޒީއާއެކު ކުރިއަށް ފިޔަވަޅުއަޅާއިރު، ކުރިއަށް އޮތް ތަނުގައި ވެސް އެންމެ ފަހުގެ ޓެކްނޮލޮޖީގެ އެހީގައި، އެންމެ ފެންވަރުގެ ނެޓްވޯކްތަކާއި، ޑިޖިޓަލް އީޖާދުތައް ފޯރުކޮށްދިނުމުގެ މެދުވެރިއެއްގެ ގޮތުގައި ދިވެހީންގެ ދިރިއުޅުން އިތުރަށް ފުރިހަމަކޮށް އުޖާލާކޮށްދިނުމުގައި އަޅުގަނޑުމެން ސާބިތުކަމާއެކު ދެމިތިބޭނެކަމުގެ ޔަގީންކަން އަރުވަން.“
ދިރާގުގެ 38ވަނަ އަހަރީ ދުވަހުގެ މުނާސަބަތުގައި ތައާރަފްކޮށްފައިވާ އޮފަތަކަކީ:
• 38ޖީބީ މުޅިން ހިލޭ: ދިރާގުގެ ޕްރީޕެއިޑް އަދި ޕޯސްޓްޕެއިޑްގެ ކޮންމެ ކަސްޓަމަރަކަށް ވެސް 1 އޮކްޓޫބަރު 2026ވަނަ ދުވަހު 38ޖީބީ މުޅިން ހިލޭ ލިބިގެންދާނެއެވެ. މި ހިލޭ ޑޭޓާ ދިރާގުއެޕް މެދުވެރިކޮށް އެކްޓިވޭޓްކުރުމަށްފަހު 24 ގަޑިއިރަށް ބޭނުންކުރެވޭނެއެވެ.
• 38 އައިޑީޑީ މިނިޓް މުޅިން ހިލޭ: ދިރާގުގެ ޕްރީޕެއިޑް ކަސްޓަމަރުންނަށް ބަންގްލަދޭޝް، އިންޑިއާ، ނޭޕާލް، ސްރީލަންކާ، ޕާކިސްތާން، ފިލިޕީންސް އަދި އިންޑޮނޭޝިއާއަށް ގުޅުމަށް 38 މިނެޓް މުޅިން ހިލޭ ލިބިގެންދާނެއެވެ.
• އައިވް: ދިރާގުން ވަނީ މި ހާއްސަ މުނާސަބަތުގައި އޭއައި މެދުވެރިކޮށް ފޯނު ކޯލްތަކަށް ޖަވާބުދީ، ފޯނު ކޯލުތައް މެނޭޖްކުރުމަށް ބޭނުންކުރެވޭނެ "އައިވް" ތައާރަފުކޮށްފައެވެ. މި ހިދުމަތައް ދިރާގުއެޕް މެދުވެރިކޮށް ސަބްސްކްރައިބްކުރެވޭނެ އެވެ.
• އޯއެންޓީ ހިލޭ އަޕްގްރޭޑް: ދިރާގު ފައިބަރ ބްރޮޑްބޭންޑް ކަސްޓަމަރުންގެ ތެރެއިން ޝަރުތު ހަމަވާ ކަސްޓަމަރުންނަށް މިހާރު ބޭނުންކުރަމުންދާ ކުރީގެ ރައުޓަރ، ފަހުގެ ރައުޓަރއަކަށް މުޅިން ހިލޭ އަޕްގްރޭޑްކުރެވޭނެ އެވެ.
• 38 ދުވަހުގެ ޕަރޓްނަރ ވައުޗަރސް: ދިރާގު ޕްރިޕެއިޑް އަދި ޕޯސްޓްޕެއިޑް ކަސްޓަމަރުންނަށް އެލީޓް ކްލަބްގެ 12 ޕަރޓްނަރ އައުޓްލެޓަކުން 38 ދުވަސް ވަންދެން ކޮންމެ ދުވަހަކު ވެސް ހިލޭ ވައުޗަރ ލިބިގެންދާނެ އެވެ. މި ގޮތުން، ކޮންމެ އައުޓްލެޓަކުން ވެސް އެ އައުޓްލެޓަކަށް އެންމެ ފުރަތަމަ ޒިޔާރަތްކުރާ 38 ކަސްޓަމަރުންނަށް ކޮންމެ ޕަރޓްނަރ އައުޓްލެޓަކުން އެއް ވައުޗަރު ހޯދުމުގެ ފުރުސަތު ލިބިގެންދާނެއެވެ. މި ވައުޗަރތައް މެދުވެރިކޮށް ކެފޭ، ރެސްޓޯރަންޓް، ރީޓެއިލް ފިހާރަތަކުން ވިޔަފާރިކުރުމުގެ ފުރުސަތު އަދި ޗުއްޓީ ހޭދަކުރުމުގެ ފުރުސަތު ލިބިގެންދާނެ އެވެ.
ދިރާގުން ދަނީ ރާއްޖޭގެ ޑިޖިޓަލް ޓްރާންސްފޯމޭޝަންގެ ދަތުރުގައި އެންމެ އިސްކޮށް ހަރަކާތްތެރިވެ ކަސްޓަމަރުންގެ ދިރިއުޅުމަށް އިތުރު ފުރިހަމަކަން ގެނެސްދިނުމަށް ގިނަ މަސައްކަތްތަކެއް ކުރަމުންނެވެ. މި ގޮތުން 1988އިން ފެށިގެން ދިރާގުން ވަނީ ރާއްޖޭގެ ޑިޖިޓަލް ކުރިމަގު ބިނާކުރުމުގެ މުހިންމު ދައުރު އަދާކޮށްފައެވެ. މި ކުންފުނިން ވަނީ ރާއްޖޭގައި އެންމެ ފުރަތަމަ ފަހަރަށް %100 މޮބައިލް ކަވަރޭޖް ފޯރުކޮށްދީ، ޒަމާނީ ހިދުމަތްތައް ތައާރަފްކޮށްފަ އެވެ. މީގެ ތެރޭގައި ރާއްޖެއަށް 5ޖީގެ ހިދުމަތް ތައާރަފްކޮށް، މި ހިދުމަތްވަނީ ރާއްޖޭގެ އާބާދީގެ %73އަށް ފުޅާކޮށްފަ އެވެ. އަދި، ދިރާގުން ވަނީ ރާއްޖޭގެ %100 މީހުން ދިރިއުޅޭ ހުރިހާ ރަށަކަށް ފައިބަރ ބްރޮޑްބޭންޑްގެ ހިދުމަތް ފޯރުކޮށްދީފަ އެވެ.
