ރާއްޖޭގެ ޓޫރިޒަމް ޕްރޮޑަކްޓުތައް ވިއްކާ ބޭރުގެ ވިޔަފާރިތަކުން ވެސް ޓީޖީއެސްޓީ ދައްކަންޖެހޭ ގޮތަށް ޓެކްސް ނަގާ އުސޫލަށް ގެނައި ބަދަލުތަކާ ގުޅިގެން، އިންޑިއާގެ ޓުއާ އޮޕަރޭޓަރުންގެ އެންމެ ބޮޑު ޖަމިއްޔާ ކަމަށްވާ އިންޑިއަން އެސޯސިއޭޝަން އޮފް ޓުއާ އޮޕަރޭޓާސް (އައިއޭޓީއޯ) އިން ކަންބޮޑުވުން ފާޅުކޮށްފި އެވެ.
ގާތްގަނޑަކަށް 2،000 އަށްވުރެ ގިނަ މެންބަރުން ހިމެނޭ އެ ޖަމިއްޔާއިން ވަނީ، މި ބަދަލުތައް ތަންފީޒުކުރުމުގެ ކުރިން ބައިނަލްއަގުވާމީ ފަތުރުވެރިކަމުގެ ސިނާއަތުގެ މުހިންމު ހިއްސާދާރުންނާއެކު މަޝްވަރާކޮށް، ނިންމުން އަލުން މުރާޖައާކުރުމަށް ދިވެހި ސަރުކާރަށް ގޮވާލާފަ އެވެ.
އައިއޭޓީއޯ އިން ޓޫރިޒަމް މިނިސްޓަރު މުހައްމަދު އަމީނަށް ފޮނުވި ސިޓީގައި ފާހަގަކޮށްފައިވާ ގޮތުގައި، ރާއްޖޭގައި ރަޖިސްޓްރީކޮށްގެން ހިންގާ ވިޔަފާރިތަކެއް ނޫން ނަމަވެސް، ރާއްޖޭގެ ފަތުރުވެރިކަމުގެ އުފެއްދުންތައް ވިއްކާ ބޭރުގެ އެޖެންޓުން ޓެކްސް ނިޒާމުގެ ތެރެއަށް ވެއްދުމަކީ ބޮޑު ގޮންޖެހުމެކެވެ. އަދި މި ބަދަލުގެ ސަބަބުން ރާއްޖެއިން ބޭރުގައި ތިބެގެން ރިސޯޓުތަކާއި ހޮޓާތަކަށް ބުކިން ހަދައިދޭ ފަރާތްތަކުގެ ހިންގުމުގެ ހަރަދު ބޮޑުވެ، ރާއްޖޭގެ ޗުއްޓީ ޕެކޭޖުތަކުގެ އަގު އުފުލިގެންދާނެ ކަމަށް ވަނީ ބުނެފަ އެވެ.
މީގެ ސަބަބުން ރާއްޖެއަށް އެންމެ ގިނައިން ފަތުރުވެރިން އަންނަ އެއް ގައުމު ކަމަށްވާ އިންޑިއާއިން ފަތުރުވެރިން ގެނައުމަށް ކުރާ މަސައްކަތްތަކަށް ހުރަސްއެޅި، ރާއްޖެ އިޝްތިހާރުކުރުމަށް ދަތިތަކާ ކުރިމަތިވެދާނެ ކަމުގެ ބިރު ވަނީ ހިއްސާކޮށްފަ އެވެ.
ހަމައެއާއެކު މި ހިނގާ އޮކްޓޫބަރު މަހުން ފެށިގެން މި ބަދަލަށް އަމަލުކުރަން ފެށި ނަމަވެސް، މިއީ ކުރިއާލައި ގިނަ ބުކިންތަކެއް ހެދިފައިވާ ދުވަސްވަރަކަށް ވާތީ، ލިބިދާނެ މާލީ ގެއްލުންތަކުން ސަލާމަތްވުމަށްޓަކައި މި ނިންމުން މަދުވެގެން އެއް އަހަރަށް ފަސްކޮށްދިނުމަށް އައިއޭޓީއޯ އިން ވަނީ އެދިފަ އެވެ.
މީގެއިތުރުން ބޭރުގެ ކުންފުނިތަކުން ރާއްޖޭގައި ރަޖިސްޓްރީވާންޖެހޭ އުސޫލުތަކާއި، ޓެކްސް ހިސާބުކުރާނެ ގޮތާއި، ފައިސާ ދައްކަންޖެހޭ މަރުހަލާތަކާ ގުޅޭގޮތުން އިތުރު ސާފުކުރުންތަކެއް ހޯދުމަށް ސަރުކާރުގެ ކަމާބެހޭ ވުޒާރާތަކާއެކު މަޝްވަރާކުރުމުގެ ފުރުސަތަކަށްވެސް އެ ޖަމިއްޔާއިން ވަނީ އެދިފަ އެވެ.
މީރާގެ އާ އުސޫލުގައިވާ ގޮތުން ބޭރުގެ ވިޔަފާރިތަކުން ޓެކްސް ދައްކަންޖެހެނީ، އެ ބަޔަކު ޕްރޮޑަކްޓް ވިއްކާ އަގުން ރާއްޖޭގެ ސަޕްލަޔަރަށް ދައްކާ އަގު ކެނޑުމަށްފަހު ބާކީވާ އަދަދުންނެވެ. މި އަދަދަކީ މިހާރު ވެސް ޓެކްސް ހިމެނޭ އަދަދަކަށްވާތީ، ޓެކްސް ރޭޓުގައި ޖެހޭ އަދަދު ހިސާބުކުރުމަށްފަހު އެ އަދަދު 1.17 އިން ބައިކުރުމަށް ވަނީ އަންގާފަ އެވެ.
ޓެކްސް ނަގާ އުސޫލަށް ގެނެސްފައިވާ މި ބަދަލާ ގުޅިގެން އިންޑިއާގެ އިތުރުން، ރަޝިއާގެ ޓްރެވަލް ޔޫނިއަން (އާރުއެސްޓީ) އާއި ހުޅަނގު ޔޫރަޕުގެ ގައުމުތަކުގެ ޓްރެވަލް ޔޫނިއަންތަކުންވެސް ވަނީ ކަންބޮޑުވުން ފާޅުކޮށްފަ އެވެ. އަދި މިކަމާ ދެކޮޅުހެދުމުގެ ގޮތުން ބޭރުގެ ބައެއް ވިޔަފާރިތަކުން މިހާރު ވަނީ ރާއްޖެ ވިއްކުން ހުއްޓާލާފަ އެވެ.
