ސަރުކާރުގެ ޚަރަދުތައް ހަމަޖެއްސުމަށް 1.2 ބިލިޔަން ރުފިޔާގެ ޓްރެޝަރީ ބިލް (ޓީ- ބިލް) ވިއްކަން ހުޅުވާލައިފި އެވެ.
ފިނޭންސް މިނިސްޓްރީން މިފަހަރު ވިއްކުމަށް ނިންމާފައި ވަނީ ޖުމްލަ 1.2 ބިލިޔަން ރުފިޔާގެ ހަތަރު ޓީ ބިލެކެވެ. ޓީ- ބިލްތައް ވިއްކުމަށް ހަމަޖެހިފައި ވަނީ ނޮވެމްބަރު މަހުގެ 4 ވަނަ ދުވަހު އެވެ.
ސަރުކާރުން ޓީ- ބިލް ވިއްކަނީ މުވައްޒަފުންގެ މުސާރަ އާއި އެހެނިހެން ހަރަދުތައް ހަމަޖައްސަން ބޭނުންވާ ވަރަށް ދައުލަތަށް އާމްދަނީ ނުލިބޭތީ އެވެ.
ޓީ- ބިލްތަކުގެ ތަފްސީލު:
- 28 ދުވަހުން އަނބުރާ ދެއްކުމަށް ވިއްކާ 235 މިލިޔަން ރުފިޔާގެ ޓީ-ބިލް
- 98 ދުވަހުން އަނބުރާ ދެއްކުމަށް ވިއްކާ 458 މިލިޔަން ރުފިޔާގެ ޓީ-ބިލް
- 182 ދުވަހުން އަނބުރާ ދެއްކުމަށް ވިއްކާ 183 މިލިޔަން ރުފިޔާގެ ޓީ-ބިލް
- 364 ދުވަހުން އަނބުރާ ދެއްކުމަށް ވިއްކާ 351 މިލިއަން ރުފިޔާގެ ޓީ-ބިލް
ޓީ-ބިލްތަކުގެ އިންޓްރެސްޓް ރޭޓް އުޅެނީ 3.50 ޕަސެންޓާއި 4.60 ޕަސެންޓާ ދެމެދުގަ އެވެ.
ޓީ-ބިލަކީ ބަޖެޓްގެ ދަރަނި ފޫބެއްދުމަށް ވިއްކާ ދައުލަތުގެ ދަރަންޏެކެވެ. ޓީ-ބިލް ވިއްކަނީ އޭގެ އަސްލު އަގަށް ވުރެ ހެޔޮކޮށް، އަދި ކަނޑައެޅިފައިވާ މުއްދަތެއް ހަމަވުމުން، އޭގެ ފައިސާ އަނބުރާ ދައުލަތުން އެފަރާތަކަށް އޭގެ އަސްލު އަގު އަދާކުރާ ގޮތަށެވެ. މީގެ ސަބަބުން ޓީ-ބިލަށް އިންވެސްޓްކުރާ ފަރާތްތަކަށް ފައިދާ ލިބެ އެވެ.
ރާއްޖޭގައި މިހާރު ޓީ- ބިލްގައި އިންވެސްޓްކުރަނީ ބޭންކްތަކާއި، ޕަބްލިކް ކުންފުނިތަކާއި، ޕެންޝަން އޮފީހުގެ އިތުރުން އަމިއްލަ ކުންފުނިތަކުންނެވެ.
