ޓެކްސް ބޭސް ފުޅާކުރުމުގެ ގޮތުން މިހާރު ޖީއެސްޓީ ނުނަގާ ހުރިހާ މުދަލަކާއި ހިދުމަތްތަކުން ޖީއެސްޓީ ނަގަން ނިންމާފައިވާ ކަމަށް ފިނޭންސް މިނިސްޓަރު މޫސާ ޒަމީރު މިއަދު ވިދާޅުވެއްޖެ އެވެ.
ރާއްޖޭގައި ބޭނުންކުރާާ ހުރިހާ މުދަލާއި ހިދުމަތުން ރާއްޖޭގައި ޓެކްސް ނަގާ ގޮތަށް ގާނޫނީ އޮނިގަނޑަށް ބަދަލު ގެނެސް، އަންނަ އަހަރުގެ މެދެއްހާ ހިސާބުގައި ތަންފީޒުކުރަން ފެށުމަށް އަންނަ އަހަރުގެ ބަޖެޓުގައި ސަރުކާރުން ވަނީ ހުށަހަޅައިފަ އެވެ. މި ބަދަލާއެކު އެންމެ އަސާސީ ބާވަތްތަކުންނާއި ސިއްހީ އަދި ތައުލީމީ ހިދުމަތްތަކުން ވެސް ޖީއެސްޓީ ނަގާނެ އެވެ.
އަންނަ އަހަރަށް ލަފާކުރާ ދައުލަތުގެ ބަޖެޓް ރައްޔިތުންގެ މަޖިލީހަށް ހުށަހަޅުއްވަމުން ފިނޭންސް މިނިސްޓަރު ވިދާޅުވީ މިހާރު ހުރި މާލީ ހިރާސްތަކަށް ރިއާޔަތްކޮށް ހަރަދު ކުޑަކުރުމާ އެކު އާމްދަނީ އިތުރުކުރުމަށް އަންނަ އަހަރު ފިޔަވަޅުތަކެއް އަޅަން ނިންމާފައިވާނެ ކަމަށެވެ.
"މިގޮތުން ފަތުރުވެރިކަމުގެ ދާއިރާއާ ގުޅުންހުރި ބައެއް ޓެކުހާއި ފީގެ ރޭޓުތައް މި އަހަރުގެ ފަހުކޮޅާއި އަންނަ އަހަރު މަތިކުރަން ވަނީ ނިންމާފައި. މީގެ ތެރޭގައި ޑިޕާޗާ ޓެކްސް، އެއާޕޯޓު ޑިވެލޮޕްމަންޓް ފީ އަދި ޓީޖީއެސްޓީގެ ރޭޓުތައް ހިމެނޭއިރު، މި ބަދަލުތައް ފަރުމާކޮށްފައިވަނީ އާންމު ދިވެހި ރައްޔިތުންނަށް ބުރަ ބޮޑުނުވާނޭގޮތަށް ބަލައިގެން،" ،" ޒަމީރު ވިދާޅުވި އެވެ.
އޭގެ އިތުރަށް ޓެކްސް ބޭސް ފުޅާކުރުމަށްޓަކައި ފިޔަވަޅުތަކެއް އެޅުމަށް ވެސް ބަޖެޓުގައި ވަނީ ހިމަނާފަ އެވެ. އެކަން ކުރަން ހުށަހަޅާ މައިގަނޑު ގޮތުގައި ރާއްޖޭގައި ބޭނުންކުރާ ހުރިހާ މުދަލަކާއި ހިދުމަތުން ރާއްޖޭގައި ޖީއެސްޓީ ނެގޭނެ ގޮތަށް ނުވަތަ ޓެކްސް ނެގުމުގެ ބައިނަލްއަގްވާމީ ކޮންސެޕްޓެއް ކަމަށްވާ "ޑެސްޓިނޭޝަން ޕްރިންސިޕަލް" ތަންފީޒު ކުރަން ފެށުމެވެ.
ޑެސްޓިނޭޝަން ޕްރިންސިޕަލް ތަންފީޒުކުރަން ފަށަން ބަޖެޓުގައި ހުށަހަޅާފައި ވަނީ އަންނަ އަހަރުގެ މެދެއްހާ ހިސާބުގަ އެވެ.
"މިއާ އެކު، އޮފް-ޝޯ ޓްރެވެލް އޭޖެންޓުންނާއި ބުކިން ޕްލެޓްފޯމްތަކުން ފޯރުކޮށްދޭ ފަތުރުވެރިކަމުގެ ހިދުމަތްތަކުން ޓީޖީއެސްޓީ ނެގޭނެ އިންތިޒާމު ހަމަޖެހޭނެ. މި ބަދަލުން ލިބޭ އެންމެ ބޮޑު ފައިދާއަކަށް ވެގެންދާނީ ރާއްޖޭގައި ހަރަކާތްތެރިވާ ވިޔަފާރިތަކާއި ރާއްޖެއިން ބޭރުގެ ބޮޑެތި އޮންލައިން ވިޔަފާރިތަކުގެ މެދުގައި ޖީއެސްޓީއާ ގުޅިގެން އުފެދޭ ޑިސްޓޯޝަންތައް ކުޑަކުރެވި، ރާއްޖޭގެ ވިޔަފާރިތަކަށް ރާއްޖެއިން ބޭރުގެ ބޮޑެތި ވިޔަފާރިތަކާ އެއް ހަމައެއްގައި ވާދަކުރުމުގެ މަގު ފަހިވެގެންދިއުން،" ޒަމީރު ވިދާޅުވި އެވެ.
އަންނަ އަހަރަށް ލަފާކޮށް ސަރުކާރުން ވަނީ 56.6 ބިލިޔަން ރުފިޔާގެ ބަޖެޓެއް ހުށަހަޅައިފަ އެވެ.
އަންނަ އަހަރަށް ލަފާކޮށް ހުށަހަޅާފައިވާ ދައުލަތުގެ ބަޖެޓުގެ ޖުމްލައަކީ 56,647,600,859 ރުފިޔާ އެވެ. މީގެ ތެރެއިން، ޚަރަދުގެ ގޮތުގައި ހިނގާނީ 49.2 ބިލިޔަން ރުފިޔާ އެވެ. އޭގެ ތެރޭގައި ހިމެނެނީ ރިކަރަންޓް ޚަރަދުގެ ގޮތުގައި 35.9 ބިލިޔަން ރުފިޔާ އެވެ. އަދި ކެޕިޓަލް ޚަރަދުގެ ގޮތުގައި 13.3 ބިލިޔަން ރުފިޔާ އެވެ.
ބަޖެޓުގައި ތަންފީޒުކުރަން ހިމަނާފައިވާ ރިފޯމްތައް
- ސަބްސިޑީގެ އެހީ ބޭނުންވާ ފަރާތްތަކަށް ސީދާގޮތެއްގައި ސަބްސިޑީ ފޯރުކޮށްދޭ ނިޒާމަށް ބަދަލުކުރުން
- އާސަންދަ ނިޒާމު މުރާޖަޢާކޮށް މިހާރަށް ވުރެ ވަށާ ޖެހޭ ފުރިހަމަ އަދި ދެމެހެއްޓެނިވި ނިޒާމަކަށް ބަދަލުކުރުން
- ތެލުގެ އަގަށް އަންނަ ބަދަލުތަކުން ކުރިމަތިވާ ފިސްކަލް އަދި އެކްސްޓާނަލް ސެކްޓަރުގެ ހިރާސްތައް ހެޖްކުރުން
- ދައުލަތުން ފޯރުކޮށްދޭ ޕެންޝަންތައް ތަކުރާރު، އިސްރާފު ނުވާނެހެން މުރާޖައާކުރުން
- އެސްއޯއީތައް ރިފޯމުކުރުން
