ދުނިޔޭގެ ދެވަނައަށް އެންމެ ބޮޑު އަންނައުނު އުފައްދާ ގައުމު، ބަންގްލަދޭޝްއިން އިންޑިއާ މެދުވެރިކޮށް ކުރަމުން އައި އެ ގައުމުގެ ޓެކްސްޓައިލް އެކްސްޕޯޓްތައް ރާއްޖެ މެދުވެރިކޮށް ދުނިޔޭގެ މާކެޓްތަކަށް ފޮނުވަން ނިންމައިފި އެވެ.
މިކަމުގެ ސަބަބުން އިންޑިއާގެ ވައިގެ ބަނދަރުތަކާއި ކަނޑު ބަނދަރުތަކުގެ ކާގޯ އާމްދަނީއަށް އަސަރުކުރާނެ ކަމަށް ބެލެވެ އެވެ. މިއީ ބަންގްލަދޭޝްއާއި އިންޑިއާގެ ގުޅުން ގޯސްވެފައިވާ ދަނޑިވަޅެއްގައި ގެނެސްފައިވާ ބަދަލެއް ކަމަށްވެ އެވެ. މިކަން އިންޑިއާގެ މީޑިއާ އައުޓްލެޓް މިންޓްއިން ވަނީ މި މައްސަލައާ ގުޅޭ ތިން ފަރާތެއްގެ މައުލޫމާތުގެ އަލީގައި ރިޕޯޓުކޮށްފަ އެވެ.
ބަންގްލަދޭޝްއިން މިގޮތަށް އަމަލުކުރަން ފަށާފައިވަނީ އެ ޤައުމުގެ ސަޕްލައި ޗެއިންގެ މައްޗަށް އިތުރު ބާރު ލިބިގަތުމަށާއި، އިންޑިއާގެ ވައިގެ ބަނދަރުތަކުގައި ދިމާވާ ލަސްވުންތަކަށް ހައްލު ހޯދައި، ޝިޕްމަންޓްތައް ފޮނުވަންޖެހޭ މުއްދަތަށް ފޮނުވުމަށް ކަމަށް އިންޑަސްޓްރީގެ މާހިރުން ބުނެފައިވެ އެވެ.
ބަންގްލަދޭޝްގެ މީޑިއާއަކުން ރިޕޯޓްކޮށްފައިވާ ގޮތުގައި މޯލްޑިވްސް އެއާޕޯޓްސް ކޮމްޕެނީ ލިމިޓެޑްއިން މިދިޔަ މާޗު މަހު ވަނީ ކަނޑާއި ވައިގެ މަގު ބޭނުންކޮށްގެން ކާގޯ ޓްރާންސްޝިޕްމަންޓްގެ ހިދުމަތެއް ތައާރަފުކޮށްފަ އެވެ. މި ހިދުމަތުގެ ދަށުން މުދާ ކަނޑުމަގުން ރާއްޖެއަށް ގެނެސް، އެތަނުން ދުނިޔޭގެ އެކި ކަންކޮޅުތަކަށް ވައިގެ މަގުން ފޮނުވުމުގެ ފުރުސަތު ލިބެ އެވެ.
އިންޑިއާ ސަރުކާރުން މިހާރު ވަނީ ބަންގްލަދޭޝްގެ ޓެކްސްޓައިލް އެކްސްޕޯޓްތައް އިންޑިއާގެ މަސްލަހަތުތަކަށް ފައިދާހުރި ގޮތެއްގައި ދެމެހެއްޓުމަށް އެކަށީގެންވާ ހައްލެއް ހޯދަން މަސައްކަތް ފަށާފަ އެވެ.
މި ބަދަލަކީ ބަންގްލަދޭޝްގެ ކުރީގެ ބޮޑުވަޒީރު ޝެއިޚް ހަސީނާ މަގާމުން ވަކިކުރުމާ ގުޅިގެން އަޅާފައިވާ ފިޔަވަޅެއް ނޫން ކަމަށް ބަންގްލަދޭޝްގެ ސަރުކާރުގެ ފަރާތުން ބުނެފައިވެ އެވެ.
