ވެލާނާ އިންޓަނޭޝަނަލް އެއާޕޯޓް (ވީއައިއޭ)ގެ އާ ފިއުލް ފާމާއި ފިއުލް ހައިޑްރަންޓް ނިޒާމުގެ ހިދުމަތް ރައީސް މުހައްމަދު މުޢިއްޒު އިފްތިތާހު ކޮށްދެއްވައިފި އެވެ.
ވީއައިއޭގައި މިއަދު ހަވީރު ބޭއްވި ޚާއްސަ ރަސްމިއްޔާތުގައި ރައީސް މުއިއްޒު އާއި އެމަނިކުފާނުގެ ނައިބު ހުސައިން މުހައްމަދު ލަތީފާއި، ސަރުކާރާއި އެމްއޭސީއެލްގެ އިސްވެރިން ބައިވެރިވެވަޑައިގެންނެވި އެވެ. އަދި އެއާލައިންތަކުން ވެސް ބައިވެރިވި އެވެ.
މި ރަސްމިއްޔާތުގައި ވާހަކަދައްކަވަމުން އެމްއޭސީއެލްގެ ސީއީއޯ އިބްރާހިމް ޝަރީފް ވިދާޅުވީ ކުރިން ބޭނުންކުރި ފިއުލް ފާމަކީ 13 މިލިއަން ލީޓަރުގެ ތެޔޮ ރައްކާކުރެވޭ ފާމެއް ކަމަށެވެ. ނަމަވެސް އަލަށް ތަރައްގީކޮށް ބޭނުންކުރަން ފެށި ފިއުލް ފާމުގައި 45 މިލިއަން ލީޓަރުގެ ޖެޓް ފިއުލް ރައްކާކުރެވޭނެ ކަމަށް ވެސް އޭނާ ވިދާޅުވި އެވެ. މީގެ އިތުރުން 1 މިލިއަން ލީޓަރުގެ ޑީސަލާއި، 100،000 ލީޓަރުގެ ޕެޓްރޯލް ރައްކާކުރެވޭނެ ކަމަށް ވެސް ޝަރީފު ވިދާޅުވި އެވެ.
އޭނާ ވިދާޅުވީ ފިއުލް ހައިޑްރަންޓް ނެޓްވޯކާއެކު، ފްލައިޓްތަކަށް ތެޔޮ އެޅުމަށް ހޭދަވާ ވަގުތު ވަރަށް ބޮޑަށް ކުޑަކުރެވޭނެ ކަމަށެވެ.
ރައީސް ޔާމީންގެ ސަރުކާރުގައި ތަރައްގީކުރަން ފެށި މި މަޝްރޫއުގެ ހިދުމަތް ދިނުމަށް އެ އެއާޕޯޓުގައި ވަނީ 8.4 ކިލޯމީޓަރުގެ ވިއުގައެއް އަޅާފަ އެވެ. އަދި މި ނިޒާމް ބޭނުންކޮށްގެން އެއްފަހަރާ 7 ބޯޓަށް ތެޔޮ އެޅުމުގެ ޚިދުމަތް ދެވޭނެ ކަމަށް އެމްއޭސީއެލްއިން ބުނެ އެވެ.
"60 ހާސް ލީޓަރުގެ ދެ ބައުޒަރު ކުރިން ބޭނުންކުރީ. އެއް ގަޑިއިރާ 30 މިނެޓް ހޭދަވޭ ބޮޑު ބޯޓަކަށް ތެޔޮ އަޅަން. މި ސިސްޓަމާއެކު މިއިން 45 ވަރަކަށް މިނެޓު އެބަ ސަލާމަތްވޭ،" އެމްއޭސީއެލްގެ ސީއީއޯ ވިދާޅުވި އެވެ.
ޝަރީފް ވިދާޅުވީ ކުރިން އޮތް ޕްލޭނަށް ބަލާއިރު، މި ހިދުމަތްތައް ދިނުމަށް އަދިވެސް އަހަރެއްހާ ދުވަސް ހޭދަވާނެ ކަމަށެވެ.
"ކުރިން އޮތް ޕްލޭނަށް މަސައްކަތްތައް ދާނަމަ 2026އަށް ވެސް މިމަސައްކަތް ނުނިމޭނެ. ރައީސް ވަރަށް ބޮޑަށް މަސައްކަތްކުރައްވާ އެއާޕޯޓް މަޝްރޫއު އަވަސްކުރަން. އަައު ޓާމިނަލްގެ ޚިދުމަތްތަކަށް ވެސް މީގެ ލުއިކަން ލިބޭނެ،" ޝަރީފް ވިދާޅުވި އެވެ.
އޭނާ ވިދާޅުވީ މިޚިދުމަތްތަކާއެކު، އެއާޕޯޓް ގްރައުންޑްގައި ފްލައިޓް އޮންނަން ޖެހޭ ވަގުތު ވަރަށް ބޮޑަށް ކުޑަކުރެވޭނެ ކަމަށެވެ. އަދި މިއީ އެއާލައިންތަކުން ކުރާ ހޭދަ ކުޑަކުރެވޭނެ ކަމެއް ކަމަށާއި އައު އެއާލައިންތައް ރާއްޖެ ގެނައުމަށް ވެސް ލިބޭ ހިތްވަރެއް ކަމަށް ވެސް ޝަރީފު ވިދާޅުވި އެވެ.
މި ޚިދުމަތްތަކާއެކު އެއާޕޯޓްގެ ގްރައުންޑްގައި ބޭނުންކުރާ ވެހިކަލްތައް މަދުކުރެވި، ގްރައުންޑްގެ ރައްކާތެރިކަން ވެސް އިތުރުރެވޭނެ އެވެ. މިއީ ޗައިނާގެ އެގްޒިމް ބޭންކްގެ ލޯނު އެހީގައި ވީއައިއޭގައި ކުރިއަށްގެންދިޔަ މަޝްރޫއެކެވެ.
