ޓޫރިޒަމުން ލިބޭ އާމްދަނީ އިތުރުކުރަން ސަރުކާރަށް ކިތަންމެހާ ވެސް މުހިންމެވެ. އެއާއެކު ދަނީ އެއާޕޯޓުގެ ފީތަކާއި ޓެކްސްތައް ބޮޑު އިންތިހާއަށް ބޮޑުކުރަމުންނެވެ. ނަމަވެސް އެކަން ކުރުމުގައި ވެސް ހައްދެއް އޮންނަންވާނެ އެވެ. އެއް ދުވަހު ނިދާ ހޭލާފައި، އެއްވެސް ބަޔަކާ މަޝްވަރާކުރުމެއް ނެތި އެއާޕޯޓު ޑިވެލޮޕްމަންޓް ފީ އާއި އެއާޕޯޓް ސާވިސް ޗާޖާއި ޓޫރިޒަމް ޖީއެސްޓީ ބޮޑުކުރަންވީއެއް ނޫނެވެ. މިހެން ހެދުމުން އޭގެ ނަތީޖާ ރަނގަޅެއް ނުވާނެ އެވެ. އެ ހިތި ނަތީޖާ ފަހަރުގައި އެއް މަސް ދުވަހުން ނުފެނި ހިނގައިދާނެ އެވެ. އެކަމަކު ރާއްޖެއަށް އަންނަން ކުރާ ހަރަދާއި ހުރުމަށް ކުރާ ހޭދަ ދުވަހެއް ދުވަހަކަށް ބޮޑުވަމުންދާ ނަމަ ޓޫރިޒަމް ދާނީ ފަހަތަށެވެ. މިއީ ސަރުކާރު ހިންގަން ތިބޭ ބަޔަކު ގަބޫލުކުރަން ބޭނުންވާ ވާހަކައަށް ނުވާނެ އެވެ.
މި ސަރުކާރުން ދާދިފަހުން އެއާޕޯޓު ޓެކްސްތަކަށާއި ޓޫރިޒަމް ޖީއެސްޓީއަށް ގެނައި ބަދަލުގެ ސަބަބުން ރާއްޖެ ކުރިޔަށް ވުރެ އެތައް ގުނައެއް އަގު ބޮޑުވެއްޖެ ވާހަކަ މިހާރު އެވަނީ ދުނިޔޭގެ އެންމެ ބޮޑެތި ނޫސްތަކުގެ ފަލަ ސުރުހީއަށް އަރަން ފަށައިފަ އެވެ. އެކަމުގެ ސަބަބުން ރާއްޖެއަށް ލިބޭނީ ޕޮޒިޓިވް އިމޭޖެއް ނޫނެވެ. އޭގެ ސަބަބުން ޔޫރަޕާއި އޭޝިއާ ސަރަހައްދުން ރާއްޖެ އަންނަ ޓޫރިސްޓުން މަދުވާނެ އެވެ. އެ ވާހަކަ އިންޑަސްޓްރީގައި ހަރަކާތްތެރިވާ އެކި ލެވެލް ބޭފުޅުން އަންނަނީ ވިދާޅުވަމުންނެވެ. ނަމަވެސް ސަރުކާރުން އެ ނިންމުން ނިންމީ އޮބިނޯންނަ ވަރަށް އައްޔަންކޮށްފައި ތިބި ސިޔާސީ މުވައްޒަފުންނަށް މުސާރަ ދޭން ފައިސާ ބޭނުންވާތީ އެ ނޫން ގޮތެއް ނެތިގެންނެވެ. އެހެން ނޫންނަމަ ފުރަތަމަ އަޅާނެ ފިޔަވަޅަކީ މަދުކުރާނެ ކަމަށް ބުނި އަދަދަށް ސިޔާސީ މުވައްޒަފުން މަދުކުރުމެވެ. ނަމަވެސް އެކަން ކުރާ ތަނެއް ނުފެނެ އެވެ. ފެންނަނީ އަދިވެސް ސިޔާސީ މަގާމުތައް އިތުރުކުރަމުންދާ މަންޒަރެވެ.
ރާއްޖެއިން ފުރާ ފަސިންޖަރުން އަތުން ނަގާ ފީ އާއި ޓޫރިޒަމް ފީ ބޮޑުކުުރުމުން އިންޑަސްޓްރީގެ އެކި ލެވެލްގެ މީހުން އަންނަނީ ނުރުހުން ފާޅުކުރަމުންނެވެ. އެއްވެސް މަޝްވަރާއެއް ކުރުމެއް ނެތި ކުއްލި ކުއްލިއަށް ބޮޑެތި ނިންމުންތައް ނިންމާތީ އެވެ. އެއީ އެއްގޮތަކަށް ވެސް އެކަން ވެގެންވާނެ ގޮތެއް ނޫނެވެ. ރާއްޖޭގެ އިގްތިސާދުގެ މައި ތަނބާ ކުޅެންވާނީ ކަމާ ބެހޭ ފަރާތްތަކާ މަޝްވަރާކޮށް އިންޑަސްޓްރީގެ ތަޖުރިބާކާރުންގެ ލަފާ ވެސް ހޯދައިގެންނެވެ.
އެކަމާ ނުރުހުން ފާޅުކޮށް ރާއްޖޭގެ ޓްރެވަލް އެޖެންސީތަކާއި ޓުއާ އޮޕަރޭޓަރުން ތަމްސީލްކުރާ ޖަމިއްޔާ، މަޓާޓޯއިން ދާދިފަހުން ވަނީ ބަޔާނެއް ނެރެފަ އެވެ.
އެ ޖަމިއްޔާއިން ވަނީ އެއާޕޯޓުން ނަގާ ޓެކުހާއި ޑިވެލޮޕްމެންޓު ފީތައް ބޮޑު ކުރުމާ ގުޅިގެން ބަޖެޓު އެއާލައިންތަކަކުން ކަންބޮޑުވުން ފާޅުކޮށްފައިވާ ކަމަށް ބުނެ ޓްރާންސްޕޯޓު މިނިސްޓަރު މުހައްމަދު އަމީންއަށް ސިޓީއެއް ފޮނުވާފަ އެވެ. އެ ޖަމިއްޔާއިން ވަނީ މަޝްވަރާގެ މޭޒަށް އައުމަށް ވެސް ސަރުކާރަށް ގޮވާލާފަ އެވެ. ނަމަވެސް ސަރުކާރުން މިހާތަނަށް އެކަމަށް އެއްވެސް އިޖާބައެއް ދީފައެއް ނުވެ އެވެ.
ޓެކްސްތަކަށް އަންނަ ބަދަލުތަކަށް ބަލާއިރު އަންނަ އަހަރު ޓީޖީއެސްޓީ އަންނަނީ އެއް ޕަސެންޓުގެ އިތުރުވުމެކެވެ. އޭރުން ދެން ނަގާނީ މިހާރު ނަގާ 16 ޕަސެންޓުގެ ބަދަލުގައި 17 ޕަސެންޓެވެ. މި އަދަދަށް ޓެކްސް ނަގަން ފަށާނީ އަންނަ އަހަރުގެ ޖޫން މަހުން ފެށިގެންނެވެ.
ނަމަވެސް ގްރީން ޓެކްސް ޖެނުއަރީން ފެށިގެން ބޮޑުވާނެ އެވެ. އެއީ ރިސޯޓުތަކާއި ސަފާރީތަކާއި ބޮޑެތި ހޮޓާތަކަށް އަންނަ ޓޫރިސްޓުންގެ އަތުން މިހާރު ނަގާ ހަ ޑޮލަރު 12 ޑޮލަރަށެވެ. އަދި ގެސްޓުހައުސްތަކަށް އަންނަ ޓޫރިސްޓުންގެ ނަގާ ތިން ޑޮލަރު ހަ ޑޮލަރަށެވެ.
އެއާޕޯޓު ޓެކްސްއަށް އަންނަ ބަދަލަކީ އިކޮނޮމީ ކްލާހުން ދަތުރުކުރާ ޓޫރިސްޓުންގެ އަތުން މިހާރު ނަގާ 30 ޑޮލަރު 50 ޑޮލަރަށް ބޮޑުވުމެވެ. ބިޒްނަސް ކްލާހުން ދަތުރުކުރާ ޓޫރިސްޓުންގެ ޓެކްސް ދެ ގުނަ ބޮޑުވެ މިހާރު ނަގާ 60 ޑޮލަރުގެ ބަދަލުގައި 120 ޑޮލަރު ނަގާނަ އެވެ. އަދި ފަސްޓް ކްލާހުގައި ދަތުރުކުރާ މީހުންގެ އަތުން ނަގާ ޓެކްސް 90 ޑޮލަރުން 240 ޑޮލަރަށް ބަދަލުވާނެ އެވެ.
ސަރުކާރުން މިފަހަރު ޓޫރިޒަމްގެ ފީތައް ބޮޑުކުރާ ކޮންމެ ފަހަރަކު އެކަމުގެ ނޭދެވޭ އަސަރު ރިސޯޓުތަކަށް އިންތިހާއަށް ކުރެ އެވެ. މިގޮތުން ޓީޖީއެސްޓީ 12 ޕަސެންޓުން 16 ޕަސެންޓަށް ބޮޑުކުރުމުން ރިސޯޓުތަކަށް އައި ގެސްޓުންގެ އަދަދު އިންތިހާއަށް ދަށްވި ކަމަށް އިންޑަސްޓްރީގައި ހަރަކާތްތެރިވާ ފަރާތުން ބުންޏެވެ.
ރާއްޖެއަށް ޓޫރިސްޓުން އުފުލާ އެއާލައިންތަކެއްގެ އެޖެންޓްކަން ކުރާ އޭސް ޓްރެވަލްގެ މެނޭޖިން ޑިރެކްޓަރު މުހައްމަދު ފިރާގު ވިދާޅުވީ ރާއްޖޭގެ ޓޫރިޒަމް ސިނާއަތް މިހާރު ކުރިޔަށްދާ މިސްރާބަށް ބަލާއިރު، ވަރަށް ބޮޑު ގޯހެއް ފެންނަ އެބައޮތް ކަމަށެވެ.
"އަޅުގަނޑު ބޭނުމެއް ނޫން އެއްވެސް މީހަކު ކުށްވެރިކުރާކަށް. އެކަމަކު އަޅުގަނޑު ކަންބޮޑުވަނީ ސިޔާސަތުތަކަށް ގެންނަ ބަދަލުތަކުގެ ސަބަބުން ކުރިމަގުގައި ކުރާނެ ނޭދެވޭ އަސަރުތަކާ މެދު. ފަތުރުވެރިކަމަކީ އަބަދުވެސް އަޅުގަނޑުމެންގެ އިގްތިސާދުގެ މައިބަދަ، ދެމެހެއްޓެނިވި ގޮތެއްގައި ދެމެހެއްޓެނިވި ގޮތެއްގައި ކުރިއެރުން ހޯދުމަށްޓަކައި ބެލެންސްޑް، ފޯވާޑް ވިސްނުމެއް ގެންގުޅެން ޖެހޭ،" އޭނާ ވިދާޅުވި އެވެ.
ފިރާގު ވިދާޅުވީ ސަރުކާރުން މިފަހުން ގެންނަން ފެށި ބަދަލުތަކުގެ ސަބަބުން ހަގީގަތުގައި ސުވާލު އުފެދޭ މި ސިނާއަތުގެ މުހިންމުކަމަށް އިސްކަންދިނުމާމެދު. އަޅުގަނޑުމެންގެ ސްޓްރެޓެޖީތައް ރީ އިވެލުއޭޓްކޮށް، ސީދާ އަސަރުކުރާ ފަރާތްތަކުގެ އަޑު އަހައި، ރާއްޖެއަކީ ދުނިޔޭގެ އެންމެ ކުރިއަރާފައިވާ މަންޒިލެއްގެ ގޮތުގައި ދެމިއޮތުމަކީ ވަރަށް މުހިންމު ކަމެއް. މިއީ ހަމައެކަނި އަދަދުތަކުގެ ވާހަކައެއް ނޫން. އަޅުގަނޑުމެންގެ މަންޒިލްގެ ހާއްސަކަން ހިމާޔަތްކޮށް، އަންނަން އޮތް ޖީލުތަކަށް ވާސިލުކޮށްދިނުމަކީ ކުރަން ޖެހޭ ކަމެއް،" ފިރާގު ވިދާޅުވި އެވެ.
ޓޫރިޒަމް ދާއިރާއާ ގުޅިފައިވާ ފީތަކާއި ޓެކްސްތައް އިންތިހާއަށް ބޮޑުކުރުމާ މެދު އިންޑަސްޓްރީގެ ކިތަންމެ ކަންބޮޑުވުމެއް ހުރި ނަމަވެސް ސަރުކާރުން އެއަޑެއް ނާހަ އެވެ. އަހާކަށް ބޭނުމެއް ވެސް ނުވެ އެވެ.
