އެމެރިކާ އާއި އިޒްރޭލް އަދި އީރާނާ ދެމެދު އުފެދިފައިވާ ހަމަނުޖެހުންތަކުގެ ސަބަބުން ދުނިޔޭގެ ވައިގެ ދަތުރުފަތުރަށް ބުރޫއަރައި، ދަތުރުފަތުރުގެ ސިނާއަތުގައި ހިއްސާވާ ކުންފުނިތަކުގެ މާކެޓް އަގުން 22.6 ބިލިއަން ޑޮލަރުގެ ގެއްލުންވެއްޖެ އެވެ. މިއީ ކޮވިޑް-19 ގެ ބަލިމަޑުކަމަށްފަހު މި ސިނާއަތަށް ކުރިމަތިވި އެންމެ ބޮޑު ގޮންޖެހުމެވެ.
މެދުއިރުމަތީގެ މުހިންމު ވައިގެ ބަނދަރުތައް ބަންދުކުރުމާ ގުޅިގެން ފާއިތުވި ތިން ދުވަހުގެ ތެރޭގައި މުޅި ދުނިޔެއިން 4،000 އަށް ވުރެ ގިނަ ފްލައިޓް ކެންސަލްކޮށްފައިވާ ކަމަށް ތަފާސްހިސާބުތަކުން ދައްކަ އެވެ. އެނަލިސްޓުން ލަފާކުރާ ގޮތުގައި މި ދަތިތައް ކުރިއަށް އޮތް ހަފުތާތަކަށް ދެމިގެންދާނެ އެވެ.
ދުނިޔޭގެ އެންމެ ބާރުބޮޑު ބައިނަލްއަގުވާމީ ވައިގެ ބަނދަރު ކަމަށްވާ ދުބާއީ އެއާޕޯޓާއި ދޯހާ އެއާޕޯޓް ބަންދުކޮށްފައި އޮންނަތާ މިއަދަށް ތިން ދުވަސް ވެފައިވާއިރު، އެތައް ހާސް ފަސިންޖަރުންނެއް ވަނީ އެއާޕޯޓްތަކުގައި ތާށިވެފަ އެވެ. މިއީ އޭވިއޭޝަން ދާއިރާއަށް ކުރިމަތިވެފައިވާ ވަރަށް ނާޒުކު ދަނޑިވަޅެކެވެ.
މި ހަމަނުޖެހުންތަކާ ގުޅިގެން ތެލުގެ އަގު 13 އިންސައްތައަށް އުފުލި، ޖެނުއަރީ 2025 ގެ ފަހުން ތެލުގެ އަގު އެންމެ މައްޗަށް ދިޔަ ދުވަސްވަރަށް މިހާރު ވަނީ ގޮސްފަ އެވެ. މީގެ ސަބަބުން އެއާލައިންތަކުގެ އޮޕަރޭޝަނަލް ހަރަދުތައް ބޮޑުވެ، އިތުރު މާލީ ދަތިތަކާ ކުރިމަތިލާން ޖެހޭނެ ކަމަށް ބެލެވެ އެވެ.
އދ. ގެ އިންޓަނޭޝަނަލް ސިވިލް އޭވިއޭޝަން އޯގަނައިޒޭޝަން އިން ވަނީ ވައިގެ ދަތުރުފަތުރުގެ ރައްކާތެރިކަމާއި، ފަސިންޖަރުންގެ ސަލާމަތްތެރިކަން ކަށަވަރުކުރުމަކީ ގައުމުތަކުގެ ޒިންމާއެއް ކަމަށް ހަނދާންކޮށްދީފަ އެވެ.
"ވައިގެ ދަތުރުފަތުރުގެ އޮޕަރޭޝަންތަކާއި، ވަސީލަތްތަކާއި ފަސިންޖަރުންގެ ސަލާމަތާއި ރައްކާތެރިކަން ކަށަވަރުކުރުމުގެ މަސްއޫލިއްޔަތު ގައުމުތަކުން އުފުލަންޖެހޭނެ،" އެ އިދާރާއިން ބުނެފައިވެ އެވެ.
