އިހަވަންދިއްޕޮޅުގައި ތަރައްގީކުރާ "މޯލްޑިވްސް އިކޮނޮމިކް ގޭޓުވޭ ޕްރޮޖެކްޓް"ގެ ޕޯޓު ތަރައްގީކުރުމާއި، މަޝްރޫއާ ގުޅުންހުރި އިތުރު މަސައްކަތްތައް ކުރުމަށް ސިންގަޕޫރުގެ ކުންފުންޏަކާ ހަވާލުކޮށްފައި ވަނީ ބިޑަށް ނުލާކަން ހާމަވެއްޖެ އެވެ.
ސަރުކާރުން މިއަދު ވަނީ އެކަމާ ގުޅޭ ފްރޭމްވޯކް އެއްބަސްވުމުގައި ސޮއިކޮށްފަ އެވެ. މި އެއްބަސްވުމުގައި މޯލްޑިވްސް އިންޑަސްޓްރިއަލް ޑިވެލޮޕްމަންޓް ފްރީ ޒޯންގެ ފަރާތުން ސޮއިކުރެއްވީ އެސްޓީއޯގެ ވެސް މެނޭޖިން ޑިރެކްޓަރު ޝިމާދު އިބްރާހީމެވެ. އަދި އޭޝިއާ އިންވެސްޓްމަންޓުގެ ފަރާތުން ސޮއިކުރީ ޗީފް ކޮމާޝަލް އޮފިސަރު ޓަން ކުން ޗިއާއޯ ޖޯޖް އެވެ.
ނަމަވެސް އޮންނަ އުސޫލުން މިފަދަ ޕްރޮޖެކްޓެއް ހަވާލުކުރުމުގެ ކުރިން އިއުލާންކޮށް ބިޑަށް ހުޅުވާލާފައެއް ނުވެ އެވެ.
އެ އެއްބަސްވުމުގެ ދަށުން އިހަވަންދިއްޕޮޅުގައި ބަނދަރު ތަރައްގީ ކުރުމުގެ އިތުރުން ބަނދަރަށް ބޭނުންވާ ހިދުމަތްތައް ގާއިމު ކުރުމަށް ވަނީ ހަމަޖެހިފަ އެވެ. ނަމަވެސް އެ މަޝްރޫއާ ގުޅޭ އިތުރު ތަފުސީލެއް އިކޮނޮމިކް މިނިސްޓްރީން ހާމައެއް ނުކުރެ އެވެ.
އިހަވަންދިއްޕޮޅު މަޝްރޫއުގެ ދަށުން ރާއްޖޭގައި ފްލޯޓިން ބަންކަރިންގެ ހިދުމަތް ދޭން އުތުރުގައި ބާއްވާފައި އޮތް ދެ ބޯޓު ގިނަ ދުވަސްތަކެއް ވަންދެން މާލޭ ސަރަހައްދުގައި ވަނީ ބަނދަރުކޮށްފަ އެވެ. މިކަމާއި ގުޅިގެން އެސްޓީއޯގެ އެމްޑީ ސިމާދު ވިދާޅުވީ ބޯޓްތައް ބަނދަރުކޮށްފައި ވަނީ މަރާމާތުކުރުމަށް ކަމަށެވެ.
ރާއްޖެ އާއި އިންޑިއާ ދެމެދު އޮންނަ 8 ޑިގްރީ ޗެނަލުން މަހަކު 300 އަށް ވުރެ ގިނަ އުޅަނދު ހުރަސް ކުރާއިރު، ބަންކަރިންގެ ހިދުމަތުން ރާއްޖޭގެ އިގުތިސާދަށް އަހަރަކު 400 މިލިއަން ވަންނާނެ ކަމަށް ސަރުކާރުން ކުރިން ބުނެފައިވެ އެވެ.
ނަމަވެސް ރާއްޖޭގައި ބަންކަރިންގެ ހިދުމަތް ފެށިތާ ދެމަސް ވުމަށް ގާތްވެފައިވާއިރު 8 ޑިގްރީ ޗެނަލުން ދަތުރުކުރި ބޭރުގެ އެއްވެސް ބޯޓަކަށް ތެޔޮ އަޅާފައެއް ނުވެ އެވެ.
